Transparency International Greenland sunaava?

Transparency International Greenland suliniaqatigiiffiuvoq nunat tamalaat suliniaqatigiiffiat Transparency International suleqatigalugu Kalaallit Nunaanni peqquserluttuliorneq pinaveersaartinniarlugu suliaqartoq.

Oqartussaasoqarfiit paasissutissanik inunnut tamanut isertuussinnginnissaasa annertuumik suliniutigineratigut peqquserluttuliorneq peqatigiiffiup akiorniarpaa aammalu peqquserluttuliornerup suuneranik ajoqutaanillu illisimasat siaruartissallugit. TI-p najoqqutassasa malinnissaannut peqatigiiffik imminut pisussaaffilerpoq imaaliornikkut: Nammineq suliffiutilinni pisortallu suliniaqatigiiffiini inatsisit, allaffissornikkut suleriaatsit il. il. eqqummaarilluni malinnaavigalugit, taamaaliornikkut pissusilersuutit peqquserluttuliornermik pilersitsisinnaasut imaluunniit suusupaginnilersitsisinnaasut eqqumaffiginiarlugit, taavalu aamma Sanngeequtaasinnaasunik uparuaasarnikkut aammalu pitsanngorsaataasinnaasunik siunnersuuteqartarnikkut

Peqquserluttuliorneq sunaava?

Peqquserluttuliorneq tassaavoq iluanaarniutigiinnarlugu oqartussaassusiligaanermik atornerluineq.

Taamaattumik peqquserluttuliuutit assigiinngiiaartorpassuusinnaapput. Assersuutitut taaneqarsinnaapput akiliilluni peqquserlutsitsisarnerit, toqqaannartumik peqquserloriaatsitut taaneqarluarsinnaasut. Politikkikkulluunniit tapiissutitut tunniuttakkat, ajunngitsuliuutitut tunissutaasartut, tapiissutit, soqutigisatigut nikingassutit, tunissutit aliikkusersuuinerilluunniit, nalorninartumi inisseqqasinnaasut, allaat nalorninartunngorluni ilumut peqquserluutiviunersut nalunarsilluni ersarivinnani. Peqquserluutit kiinnat assigiinngitsorpassuusinnaallutik, ataatsimik ataatsimoorussaqarput, ilisarnaatigivaat tamakkerlutik inuiaqatigiinni naligiinnginnermik pilersitsisarput, imaammat innuttat aaliangersimasuinnaat – attuumassuteqarfitik aqqutigalugu imaluunniit immaqa akiliillutik- periarfissanik peqalertarmata, inuiaqatigiinni naliginnaasumik allat periarfissaqarfiginngisaannut. Taamaattoqartarnerisigut aamma illit peqquserluuteqartarnernut  arlaatigut kalluagaasarputit.

Pasinapiluttumik kalerriineq

Inuiaqatigiinni pasinapiluttumik kalerriisut pisariaqartippagut 

Inatsisartut Upernaamut Ataatsimiilerunik inatsisissaq pingaarutilik pingajussaaneerullugu sammisussaavaat, tassaasoq whistleblowerinut illersuisinnaanissamut inatsisissatut siunnersuut. Transparency International Greenlandip partiit tamakkerlugit kajumissaaruteqarfigai inatsisissamut taperseeqqullugit. 

Nunatsinni pisuussutigut, imartatsinniillutillu pinngortitamiipput, nunarput tamakkerlugu siammarsimasumiillutik. Transparency International Greenlandip pingaarutilerujussuartut isigivaat, tamakkiilluta tamaavitta pissuussutigut taakkua paarilluassagigut. Qanorluunniit nakkutilliinikkut aaqqissuisoqarsimatigigaluarpat, tamanna ajoraluartumik naammanngilaq. 

Atorfilittanik allanilluni peqartariaqarpugut pisariaqartillugillumi, inuit eqqunngitsuliortunik nakkutiginninniarsinnaasut, peqquserluuteqarniarsarisunut, kammalaatersortunik, allatigulluunniit systemimik atornerluisunik, ilisimasaqalersimagaanni, toqqaannartumilluunniit ajortuliortoqarsimatillugu, toqqissisimasumik apuussisinnaanissamut periarfissaqartinneqartariaqarput. Taamaattumik whistleblowerinut tunngatillugu inatsimmik pilersitsisariaqavippugut. 

Whistleblowerinut illersuutaasinnaasussanik ersarissunik peqalertariaqavippugut taannalumi inaarsarneqartariaqarpoq, whistleblowerit illersugaasinnaanissaat periarfissanngortariaqarpoq. Tamanna pilerpat toqqammivissinneqassaagut siumut isigisinnaanngorluta inuiaqatigiittut nunattalu pissarititaanik paarsilluarsinnaanissatsinnut. 

Ukiorpassuanngortuni whistleblowerinik illersuisinnaanngornissaq oqallisigineqarpoq. Inatsisartuni arlariaqalutik qulequtaq eqqartugassanngorneqaqqanikuuvoq. 

Whistlebloweriorusussinnaallutit eqqarsaatersuutiginikuuiuk? 

Ullumikkut assigiinngitsunik whistleblowereqarnerup tungaatigut aaqqissuussisoqarnikuuvoq, suliffissuit iluanni avataaniittunillu. Peqquserlunnermik akiuinissaq pillugu atuagassiami kommuninullu atugassiami (Saqqummersitat iserfigalugu nassaarisinnaavatit) whistleblowerit pillugit paasisaqarsinnaavutit. Transparencyp tungaaniik innersuussutigisinnaavarput, misissuataassagit sulifferni tassuunakkut arlaatigut aaqqissuussisoqarsimanersoq. Sinniisorsi aamma oqaloqatigisinnaavat, arlaatigut nalornissuteqassagaluaruit. 

Transparency suliassanut ataasiakkaanut akulerussuussinnaanngilaq, taamaattumik ikiuisinnaanngilaq, arlaatigut pillaatitut akiuniutinut pulatinneqassagaluaruit. 

Nutaarsiat