Transparency International Greenland:
Qineqqusaarnermi akisussaaffimmik tigusigit!
Transparency International Greenland (TIG) 28. november qinersinissamut atatillugu isertuaatsumik ingerlatsinissaq pillugu suliniuteqalerpoq. Peqquserlulluni iluanaarniarnermut qanitarisanillu salliutitsisarnermut naaggaarsinnaaneq aammalu qinigaasussat ammasumik, isertuaatsumik innutaasunillu akuutitsisumik ingerlatsinissaannik piumasaqarsinnaaneq qinersisartuniippoq.
Anguniagaraarput Kalaallit Nunaat peqquserlulluni iluanaarniarfiunngitsoq. Ulluni tulliuttuni oqariartuutit taamatut nipillit allagartarsuarni allakkiorfeeqqanilu nunarput tamakkerlugu takussaassapput. Allagartarsuit qineqqusaarutit akornanni nivinngarneqassapput, kisianni partiip aqqanik qineqqusaartulluunnit ataasiakkaat aqqannik allassimaffiussanatik. Takoqqusaarutinummi akisussaasoq tassaassaaq Transparency International Greenland (TIG).
– TIG partiit arlaannaannilluunnit imaluunnit qineqqusaartunik aalajangersimasunik tapersersugaqanngilluinnarpoq. Akerlianik qinersisartut kaammattorusuppavut peqquserlulluni iluanaarniartarneq qanigisanillu salliutitsisarneq pillugit qinigassanngortittut tamaasa isumanniik ujartuiffigisaqqullugit. Aamma kaammattuutigaarput qineqqullugit partiit qineqqusaartullu ataasiakkaat peqquserlulluni iluanaarniarmut akerliunerminnik ersersitsisut aammalu ammasumik, isertuaatsumik innutaasununillu akuutitsisumik naalakkersuinikkut ingerlatserusuttut, TIG-mi siulittaasoq Anita Hoffer oqarpoq.
TIG’p suliniuteqarnera alloriarnernik pingasunik katitigaasoq tallimanngorpat 7. november aallarnerneqassaaq. Allagartarsuit allakkiorfeeqqallu siullertut saqqummissapput, Anita Hoffer nassuiaavoq.
- Allakkiorfeeqqani naqinneqarnikuupput apeqqutissatut siunnersuutit, qineqqusaartunik ataatsimiisitsinerni atorneqarsinnaasut imaluunnit qineqqusaartunut nassiunneqarsinnaasut. Allagartarsuarni kaammattuutaavoq qineqqullugit qineqqusaartut peqquserlulluni iluanaarniarmut akerliunerminnik ersersitsisut aammalu ammasumik, isertuaatsumik innuttaasununillu akuutitsisumik naalakkersuinikkut ingerlatserusuttut, siulittaasoq oqarpoq.
Atortussiat Kalaallit Nunaannut tamarmut nassiussorneqarnikuupput, oqariartuutinik siammartereqataanissaq aammalu atortussianik atuinissaq kaammattuutigineqarluni. Suliniummut atortussiat aamma Facebook aqqutigalugu siammmarterneqassapput.
Alloriarneq tulleq tassaavoq “Peequserlulluni iluanaarniarnermut akerliuneq pillugu nalunaarut.”
- Allagartarsuaq atsiornerpassuarnik inissalik naqitsinnikuuarput. Taanna illoqqarfinnut arlariinnut ingerlatinneqassaaq, novemberip 6-ani ilaasortanik ataatsimiititsinitsinni ilaasortavut atsiornissamut periarfissinneqareerpata. Atsiortut tamarmik allagartaarannguamik nalunaarutip imarisaanik allassimaffiusumik tunineqassapput, atsioqataasimanermik uppernarsaatitut. Takkulluni allagartarsuarmut atsiornissaq periarfissaqarfiginngikkaanni aamma Facebook-ikkut atsiortitsinermut atsiortoqarsinnaavoq, Anita Hoffer oqarpoq.
FN’ip silarsuaq tamakkerlugu peqquserlulluni iluanaarniarneq pillugu akerliiunermut ullorititaani 9. december TIG-mit atsiortitsineq nangeqqinneqassaaq, tassani ilaatigut Inatsisartunut qinigaasimasut kaammattorneqassallutik atsioriartoqullugit – atsioreersimanngikkunik.
Alloriarneq kingulleq tassaavoq 19. november innuttaasunik akuutitsineq qulequtaralugu qineqqusaartitsineq. Tassani Inatsisartunut qineqqusaartunut apeqqutigineqassaaq qanorpiaq iliorlutik innuttaasunik akuutitsinissaq suliniutiginiarneraat.
Transparency International Greenland-imit tamassi qinersilluarnissassinnik kissaappatsigit, neriulluta qineqqusaartut apeqqarissaarfigilluartarumaarisi, aamma inuttut ataasiakkaatut akisussaaqataanermut peqquserlullunilu iluanaarniartarnermut tunngasunik.