TUSAGASSIUTITIGUT NALUNAARUT
- november 2018
Transparency International Greenlandimi (TIG) suliitigalutik siulersuisunit allattoqarfimmiillu aallartitat sapaatip akunnerata siuliani Transparency Internationalip ukiumoortumik ilaasortanik ataatsimiititsinerani (AMM-imi) aammalu IACC-mi ataatsimeersuarnermi (nunarsuaq tamakkerlugu peqquserlutsaaliuineq pillugu) ataatsimeersuarnermi, Københavnimi ingerlanneqartumi inunnillu 1800-nit nunanit 144-meersuusunit inuinnarnit, naalakkersuisunit, sinniisoqaqrfinnit aammalu namminersorlutik ingerlatsisunit peqataaffigineqartumi, ataatsimeeqataapput.
IACC-mi ataatsimeersuarnermi Kalaallit Nunaat, Estland aammalu Island peqatigiillutik workshop-ertitsipput qulequtaralugu “My friend, my cousin, my business partner” (“ikinngutiga, illoorara niuernermilu suleqatiga”). Tassani sammineqarpoq inuiaqatigiinni mikisuni kikkut ”tamarmik ilisarisimaqatigiiffiini” tatigisaalluni akisussaaffittut tigummisanik qanoq iliorluni atornerluisinnaaneq pinngitsortinniarneqarsinnaasoq. Peqataappullu inuit 150-it sinnerlugit amerlatigisut. Tusarnaartullu arlaqartut, nunarsuarnit assigiinngitsuneersut, saqqummiuppaat nunat mikisutulli assingusunik unammiornartunik akiorniagassaqarnertik. Assersuutigalugu Nigeriameersoq saqqummiussivoq oqaatigalugu tassani nunamini assingusunik unammiornartunik ajornartorsiuteqarlutittaaq, naak nunartik inuttunerujussuugaluartoq. Tamatut ililluni Workshopernermi uppernarsarneqarpoq, tatiginartumik akimullu ersittumik suleriuseqarnissaq pineqartillugit Kalaallit Nunaat kisiartaanngimmat, taamatullu erserluni iluaqutigisinaagipput nunani allani peqquserlutsaliuinerit qanoq ingerlanneqartut malinnaaffigissallugit.
Saniatigullu TIG-mit aallartitaasut workshopit assigiinngitsut peqataaffigivaat taakkunanngalu angerlaassassaminnik isumassarsiortorlutik soorlu eqqarsaatigalugit saqqummiussissutit peqquserluttarnerit inuillu piginnaatitaaffiinik unioqqutsitsinerit qanoq imminnut ataqatigiittarnerannut tunngasut.
IACC naggaserlugu nammassineqarpoq The Copenhagen Declaration – Stand Together for peace, security and development, TIG-mit peqataaffigilluinnarneqarsinnaasoq. Isumaqatigiissutaasullu taassuma tamakkiisumik oqaasertalerneqarnera takuneqarsinnaavoq https://iaccseries.org aqqutigalugu. Nittartakkamilu tassani aamma nunat naalakkersuisunit aallartitaqarlutik peqataasut akornanni isumaqatigiissutit assigiinngitsuttaaq takuneqarsinnaapput.
Ukiumoortumik ilaasortanik ataatsimiititsinermit (AMM-imit) TIGmit paasineqarluni tiguneqarpoq, unamminartorpassuit, soorlu pisuussutinut isumaqatigiissusiaasartunullu atatillugit akiorniakkatta ilarpassuini itut, paasineqarluni nunanit ilaasortanit allanit aamma taamaattut takussaasuummata. Kiisalu TIG-mut isumassarsilluartitsipput ilasortat allat aallartissimasaasa ilai – nunatsinni nunatsinnut naleqqussaqqilaarlugit ingerlanneqarsinnaalluartut.
“TIG-imit aallartitaasut workshop-ini assigiinngitsuni peqataapput, tamannalu peqqutigalugu isumassarsianik assigiinngitsunik angerlaassuilluta. Maannalu paasisatta siulersuisoqatitsinnut ilisaritinnissaat qilanaaraagut, taamatullu akunnitsinni tulleriiaarisinnaalernissarput aamma qilanaaralugu, Kalaallit Nunaanni isumaqarluartumik ingerlanneqarsinnaasut suussasut nalilersorlugit”. TIG-mi siulittaasuusoq Anita Hoffer oqarpoq.