Tusagassiutitigut nalunaarut
TIG nukittorsarneqarpoq
Transparency International Greenland (TIG) qaffasissunik anguniagaqarpoq tamaasali angussallugit piffissaaleqinarluni. Taamaattumik soqutigisaqaqatigiiffiup allattoqarfiani pilersaarusiornermut pisortatut atorfinitsipparput Marianne Lykke Thomsen. ”TIG-p allattoqarfiani qilanaarpugut Marianne-p ukiorpassuarni misilittagaanik piginnaaneqarfigisarpassuinillu atuisinnaalerluta iluaquserneqarnissatsinnik” TIG-mi siulittaasuusoq Anita Hoffer oqarpoq. ”Inuk Marianne-tut piginnaaneqartigisoq qinnuteqarpat, soqutigisaqatigiiffitsinni peqataarusulluni, taava sukkanerpaamik akuersaarlugu tigusariaqarparput”, itisililluni nangippoq.
Marianne Lykke Thomsen, København-ip Universitet-ianit eskimolog-itut magister-iusoq ukiorpaalunni nunanut allanut pisortaqarfimmi atorfeqarnikuuvoq, tassanilu FN-imut tunngasunik inuit piginnaatitaaffii aammalu nunap inoqqaavisa piginnaatitaaffii pillugit suliqarsimalluni. Kalaallit Nunaannilu inuit piginnaatitaaffii pillugit Siunnersuisooqatigiit pilersinneqarput suliai taaneqartut ilaatigut tunngavigalugit.
Marianne Lykke Thomsen ukiut kingulliit 30-it Nuummi najugaqarsimavoq 1998-imiit ukioq 2002-p tungaanut Canadami Kalaallit Aallartitaqarfiani inissitaasimalluni ukiullu ingerlanerini Kalaallit Nunaanni ilinniartoqarfinni arlaqartuni ilinniartitsisarsimalluni kiisalu ICC-mi avatangiisinut piginnaatitaaffinnullu tunngasunik suliaqartarsimalluni.
Privat-itut Marianne Lykke Thomsen nunarsuaq tamakkerlugu naalakkersuinermut attuumassuteqanngitsumik Indigenous Affairs-ip (IWGIA-p) ataani piginnaatitaaffiit pillugit suleqatigiissitami København-imi allattoqarfeqartumi siulersisuni ilaasortaavoq maannalu Roskilde Universitet-imi avammut attaveqarnermik master-itut ilinniarnini inaangajalerlugu.
Marianne Lykke Thomsen-ip uigivaa Sulisitsisuni (GE-mi) pisortaq Brian Buus Pedersen.
”Ukiuni arlaqartuni Transparency-p sulinera malittarisimavara minnerunngitsumillu ilaasortanngornerma kingorna paasisimallugit soqutigisaqatigiiffiup suliai suusut. Suliaalu toqqamik peqataaffigalugit suli annertusaaqataaffigerusuppakka, taamaattumik pilersaarusiortutut pisortassarsiortoqalermat, uannut pissusissamisoortutut ippoq qinnuteqarnissaq”, Marianne Lykke Thomsen TIG-ip allattoqarfiani suleqataalernissani pillugu nassuiaavoq.
Aallarniutigalugu atorfik piffissaligaavoq, sivitsorneqarsinnaasumilli, TIG-p allattoqarfia aningaasartuutissanut tunuliaqutsiisinnaasunik nassaarsinnaassappat.